Американың Флорида штатында АҚШ пен Украина өкілдері Вашингтонның бейбітшілік жоспарын талқылап жатыр.
Украина делегациясының жетекшісі Рустем Умеров телеграм-арнасында келіссөз басталғанын хабарлады. Ақпарат құралдары оның алғашқы жазбасы жоғалып кеткенін, бір сағаттан кейін жаңа жазбасы жарияланғанын жазды. Умеров кездесуден де сурет жариялаған.
Умеровтің сөзінше, ол Украина президентімен байланыста отыр. Украин делегациясы елдің мүддесін қорғау және Женевадағы жуырдағы кездесу кезінде қол жеткізілген келіссөз негізінде алға жылжуға басымдық береді деді ол.
Бұған қоса, АҚШ мемлекеттік хатшысы Марко Рубионың “айтарлықтай ілгерілеушілікке қол жеткізгені” туралы айтқан видеосы да жарияланды. Рубионың сөзінше, соғысты тоқтату ғана емес, болашақ Украинаның тәуелсіздігі мен гүлденуі де талқыланып жатқанын айтты.
Axios басылымының дерегінше, кездесу АҚШ президентінің арнайы уәкілінің Майамидегі гольф-клубында өтіп жатыр. Аты-жөні аталмаған Америка шенеунігіне сүйенген басылым АҚШ бүгін Украинамен жер мәселесі және Украина қауіпсіздігіне кепілдік беру жағына қатысты "келіспеушіліктерді жойғысы" келеді. Қалған пунктер өткен жексенбі күні Женевада келісілген.
Келіссөзге АҚШ мемлекеттік хатшысы Марко Рубио және арнайы уәкіл Стив Уиткофпен қатар АҚШ президентінің күйеубаласы Джаред Кушнер де қатысып жатыр. Украина делегациясына Андрей Ермактың отставкасынан кейін Украина ұлттық қауіпсіздік кеңесінің жетекшісі Рустем Умеров жетекші ретінде тағайындалған. Делегация қатарында сонымен бірге сыртқы істер министрінің орынбасары Сергей Кислица, бас штабтың бастығы Андрей Гнатов, барлау және өзге де қызмет өкілдері қатысып жатыр.
Алдағы апта басында Уиткофф бастаған АҚШ өкілдері Мәскеуге барады. Кремльдің баспасөз хатшысы Дмитрий Песковтің сөзінше, бұл 4 желтоқсанда болады. Ал дәл осы күні Владимир Путин Үндістанға сапарлайды деп айтылады.
- Қараша ортасында ақпарат құралдары АҚШ әкімшілігі әзірлеген Ресейдің ұсыныстары ескерілген 28 пунктен тұратын бейбітшілік жоспары барын хабарлаған. Жоспар өзге жайттармен қатар Ресейге Донецк облысының жаулап алынбаған аумағын беруді, Украина әскері санына шектеу қою, ЕО бұғаттаған Ресей активтерін үйлестіруге АҚШ-ты қатыстыру сияқты пунктерді қарастырады. Украина осы жоспар негізінде жұмыс істеуге дайын екенін, алайда бірнеше пунктпен келіспейтінін білдірген. 23 қараша Женевада өткен АҚШ, Украина және ЕО өкілдері қатысқан келіссөз кезінде жоспарға түзетулер енгізілгенмен, түпкілікті мәтін әзірге дайын емес. Қазір онда 28 пунктің 22-ге дейін қысқартылғаны белгілі.